Kombëtarja e Brazilit po përdor teknologjinë më të avancuar të monitorimit të lojtarëve në përpjekje për t’u rikthyer te trofeu i Kupës së Botës, që i mungon prej vitit 2002.
Futbollistët brazilianë mbajnë jelekë inteligjentë (“smart vests”) të pajisur me sensorë, të cilët regjistrojnë të dhëna të detajuara si shpejtësia e vrapimit, rrahjet e zemrës, niveli i lodhjes dhe procesi i rikuperimit nga dëmtimet. Të dhënat e mbledhura nga klubet ku aktivizohen lojtarët i dërgohen stafit shkencor të kombëtares braziliane, duke i lejuar trajnerit Carlo Ancelotti dhe bashkëpunëtorëve të tij të monitorojnë vazhdimisht gjendjen e futbollistëve, edhe kur ata luajnë në kontinente të ndryshme.
Sipas kreut të departamentit të shkencës sportive të Brazilit, Guilherme Passos, sistemi ndihmon stafin teknik të kuptojë saktësisht gjendjen fizike të lojtarëve dhe të marrë vendime më të informuara për përzgjedhjen e skuadrës.
Teknologjia përdoret veçanërisht për monitorimin e futbollistëve që rikuperohen nga dëmtime muskulore, si dhe për të vlerësuar ngarkesën fizike të secilit lojtar. Kjo ndikon edhe në vendimet taktike, duke ndihmuar trajnerët të përcaktojnë se cilët lojtarë duhet të aktivizohen nga minuta e parë dhe cilët mund të përdoren si zëvendësues.
Megjithatë, ekspertët theksojnë se statistikat nuk janë gjithçka. Passos kujton rastin e një lojtari që përshkonte vetëm rreth 6 kilometra gjatë një ndeshjeje, shumë më pak se shokët e skuadrës. Por pas analizimit të pamjeve, stafi kuptoi se ai ishte vazhdimisht në pozicionin e duhur dhe lëvizte me efikasitet maksimal.
“Ai ishte gjithmonë në vendin e duhur, në pozicionin perfekt taktik”, tha Passos, duke nënvizuar se futbolli nuk matet vetëm me kilometra të përshkuar apo shifra fizike.
Përveç jelekëve inteligjentë, në Botërorin 2026 do të përdoret edhe një asistent i bazuar në inteligjencën artificiale, i zhvilluar nga FIFA dhe Lenovo, i cili analizon miliona të dhëna dhe ofron informacion të menjëhershëm për trajnerët dhe lojtarët. Megjithatë, drejtuesit e Brazilit besojnë se, pavarësisht revolucionit teknologjik, faktori vendimtar mbetet gjykimi njerëzor. Sipas tyre, teknologjia mund të ndihmojë në marrjen e vendimeve, por suksesin në fushë do ta përcaktojnë gjithmonë lojtarët.
