Irani ka rënë dakord të mos prodhojë dhe as të mos blejë armë bërthamore, sipas një projekt-memorandumi mirëkuptimi të arritur mes Teheranit dhe Uashingtonit. Lajmi është bërë i ditur nga një zyrtar i lartë iranian për agjencinë Reuters.
Sipas burimit, çështja e rezervave ekzistuese të uraniumit të pasuruar të Iranit do të diskutohet gjatë 60 ditëve të ardhshme, pas arritjes së marrëveshjes fillestare. Teherani po kërkon që procesi i hollimit të materialit bërthamor të kryhet brenda territorit iranian.
Zyrtari iranian tha se Shtetet e Bashkuara kanë rënë dakord të lehtësojnë përkohësisht sanksionet ndaj sektorit iranian të naftës, duke i mundësuar Iranit të eksportojë naftë dhe të përfitojë nga të ardhurat e krijuara.
Një tjetër element i rëndësishëm i draft-marrëveshjes është rihapja e menjëhershme e Ngushticës së Hormuzit nga Irani për të gjitha anijet tregtare, ndërsa SHBA-të do t’i japin fund bllokadës detare ndaj porteve iraniane.
Reuters raporton gjithashtu se marrëveshja parashikon lirimin e aseteve iraniane të ngrira, me vlerë rreth 25 miliardë dollarë, përmes transfertave direkte, bashkëpunimit me vendet e rajonit dhe linjave të kreditit financiar.
Sipas burimit, Irani angazhohet të ruajë status quo-në bërthamore deri në arritjen e një marrëveshjeje përfundimtare, duke mos pasuruar uranium dhe duke mos zgjeruar objektet bërthamore ekzistuese.
Nga ana tjetër, SHBA-të zotohen të mos vendosin sanksione të reja ndaj Iranit gjatë periudhës së negociatave për marrëveshjen përfundimtare.
Megjithatë, detajet e plota të draftit mbeten ende objekt diskutimesh dhe nuk është bërë e ditur se kur mund të formalizohet marrëveshja mes palëve.
