Piktori i njohur britanik, David Hockney, i cili u nda nga jeta këtë javë në moshën 88-vjeçare, njihej jo vetëm për veprat e tij të famshme, por edhe për dashurinë e pandarë ndaj duhanit. Për dekada me radhë ai refuzoi këshillat e mjekëve për të lënë cigaren, madje shpesh bënte shaka se kishte arritur t’i mbijetonte katër prej tyre.
Hockney e konsideronte duhanin pjesë të stilit të tij të jetesës dhe një simbol të lirisë personale. Ai mbante rreth 2 mijë cigare në shtëpi “për emergjenca” dhe u përfshi shpesh në debate publike kundër kufizimeve ndaj duhanpirësve. Në vitin 2025 ai u përplas edhe me autoritetet e metrosë së Parisit, të cilat refuzuan një poster të ekspozitës së tij sepse në autoportretin e artistit shfaqej një cigare.
Edhe pse pësoi probleme shëndetësore, përfshirë një mini-goditje në tru në vitin 2012, Hockney nuk e fshehu kurrë bindjen se secili duhet të jetë i lirë të bëjë zgjedhjet e veta. Deri në fund të jetës, ai mbeti një nga figurat më të njohura të artit bashkëkohor dhe një nga mbrojtësit më të zëshëm të asaj që e quante “liria individuale”.
