Presidenti i Shteteve të Bashkuara, Donald Trump, ka njoftuar emërimin e Jay Clayton si kandidat për postin e drejtorit të ardhshëm të Inteligjencës Kombëtare (DNI), një nga pozicionet më të rëndësishme në strukturën e sigurisë kombëtare amerikane.
Lajmi u bë i ditur nga vetë Trump përmes një postimi në platformën Truth Social, ku ai vlerësoi figurën e Clayton dhe i bëri thirrje Senatit që të procedojë me konfirmimin e tij sa më shpejt.
“Pak njerëz në komunitetin ligjor gëzojnë respektin që ka Jay. E inkurajoj Senatin e Shteteve të Bashkuara ta konfirmojë atë sa më shpejt të jetë e mundur”, shkroi Trump.
Aktualisht, Clayton shërben si prokuror federal për Distriktin Jugor të Nju Jorkut, ndërsa më herët ka drejtuar Komisionin e Letrave me Vlerë dhe Bursave (SEC) gjatë mandatit të parë presidencial të Trump.
Nominimi i tij vjen në një moment debatesh të forta politike në Uashington, pas vendimit të mëparshëm të Trump për të emëruar Bill Pulte si drejtues të përkohshëm të Inteligjencës Kombëtare, pas largimit të planifikuar të Tulsi Gabbard nga posti. Emërimi i Pulte, i cili nuk ka eksperiencë në fushën e sigurisë kombëtare, u kritikua si nga demokratët ashtu edhe nga republikanët në Kongres.
Sipas mediave amerikane, kundërshtitë ndaj zgjedhjes së Pulte kanë ngritur shqetësime edhe për funksionimin e mekanizmave të mbikëqyrjes së inteligjencës dhe sigurisë kombëtare.
Nëse konfirmohet nga Senati, Jay Clayton do të marrë drejtimin e komunitetit amerikan të inteligjencës, duke mbikëqyrur koordinimin e agjencive kryesore të sigurisë dhe inteligjencës së Shteteve të Bashkuara.
