Ndërsa tifozë nga e gjithë bota po mbërrijnë në Amerikën e Veriut për Kupën e Botës 2026, një shpërthim i virusit Ebola në Afrikën Lindore ka vënë në alarm autoritetet shëndetësore të vendeve pritëse.
Lloji i rrallë Bundibugyo i virusit Ebola u shpall për herë të parë në Republikën Demokratike të Kongos më 15 maj. Sipas të dhënave zyrtare, deri tani janë regjistruar të paktën 488 raste infektimi dhe 86 viktima. Sëmundja është përhapur edhe në Ugandën fqinje, ndërsa Organizata Botërore e Shëndetësisë e ka shpallur situatën një “emergjencë ndërkombëtare të shëndetit publik”.
Pavarësisht shqetësimeve, Federata e Futbollit të Republikës Demokratike të Kongos dhe FIFA kanë konfirmuar se kombëtarja kongoleze do të marrë pjesë normalisht në Kupën e Botës 2026.
Pjesëmarrja e ekipit ishte vënë në dyshim pasi Qendra Amerikane për Kontrollin dhe Parandalimin e Sëmundjeve (CDC) kishte kufizuar hyrjen në SHBA për personat që kishin qëndruar në Republikën Demokratike të Kongos, Ugandë ose Sudanin e Jugut gjatë 21 ditëve të fundit. Megjithatë, pas konsultimeve mes drejtuesve të FECOFA-s dhe FIFA-s, ekipi mori autorizimin për të udhëtuar.
Frika nga Ebola kishte sjellë edhe anulimin e një ndeshjeje miqësore mes Kongos Demokratike dhe Kilit në Spanjë. Kryebashkiaku i La Línea de la Concepción, Juan Franco, njoftoi se kishte firmosur dekretin që ndalonte zhvillimin e takimit të planifikuar për 9 qershor.
Kombëtarja kongoleze, e njohur me nofkën “Leopardët”, do të stërvitet në stadiumin “SaberCats” në Hjuston. Në listën me 26 futbollistë të grumbulluar spikasin sulmuesi Yoane Wissa dhe mesfushori Noah Sadiki.
Republika Demokratike e Kongos bën pjesë në Grupin K dhe do të luajë kundër Portugalisë më 17 qershor në Hjuston, ndaj Kolumbisë më 23 qershor në Guadalajara dhe përballë Uzbekistanit më 27 qershor në Atlanta.
Autoritetet në Hjuston kanë deklaruar se janë në gatishmëri, por jo në gjendje paniku. Gjyqtarja e Qarkut Harris, Lina Hidalgo, tha se zona është e përgatitur për të menaxhuar çdo rrezik të mundshëm shëndetësor. Aeroporti Ndërkombëtar “George Bush” është caktuar si një nga tre aeroportet amerikane që do të presë udhëtarët e ardhur nga Republika Demokratike e Kongos, Uganda dhe Sudani i Jugut. Të gjithë pasagjerët do t’i nënshtrohen kontrolleve shëndetësore nga CDC-ja, përfshirë matjen e temperaturës dhe verifikimin e historikut të udhëtimeve.
Sipas autoriteteve amerikane, Ebola është dukshëm më pak ngjitëse se COVID-19, pasi transmetimi kërkon kontakt të drejtpërdrejtë me lëngjet trupore të një personi të infektuar.
