Bill Gates po dëshmon me dyer të mbyllura para Komitetit të Mbikëqyrjes së Dhomës së Përfaqësuesve të SHBA-së, në kuadër të hetimit mbi lidhjet e tij me Jeffrey Epstein. Dëshmia e tij po regjistrohet me shkrim dhe jo në video, ndërsa transkripti pritet të bëhet publik në një fazë të mëvonshme.
Bashkëthemeluesi i Microsoft-it nuk është akuzuar për asnjë shkelje që lidhet me Epstein. Megjithatë, ai kishte një marrëdhënie profesionale me financierin e ndjerë dhe është takuar me të në mënyrë të përsëritur gjatë viteve 2011–2014. Takimet kishin në fokus diskutime për krijimin e një fondi investimi, një projekt që në fund nuk u realizua.
Gates e ka cilësuar vazhdimisht marrëdhënien e tij me Epstein si një “gabim të madh” dhe ka pranuar se ka pasur afera jashtëmartesore me gra që Epstein i njihte. Në të njëjtën kohë, zyra e tij ka mohuar kategorikisht akuzat e përfshira në dosjet e çështjes Epstein, duke i cilësuar ato si “plotësisht absurde”.
Mes tyre përfshihen pretendime se Gates përdorte drogë, kishte “takime seksuale të paligjshme” dhe se dyshohet t’i kishte transmetuar ish-bashkëshortes së tij, Melinda French Gates, një sëmundje seksualisht të transmetueshme, duke i dhënë fshehurazi antibiotikë.
Para se të hynte në sallën e dëshmive, Gates u tha gazetarëve se po paraqitej vullnetarisht për të ndihmuar punën e komisionit.
“Jam i kënaqur që jam këtu vullnetarisht për të dëshmuar dhe për të ndihmuar në punën e Komisionit. Do të filloj me një deklaratë hyrëse dhe shpresoj që dëshmia ime të kontribuojë në përpjekjen e rëndësishme për t’u sjellë drejtësi viktimave”, deklaroi ai.
Ndërkohë, New York Times raportoi se Gates ka angazhuar ish-këshilltarin e Komitetit të Mbikëqyrjes, Jake Greenberg, për ta përgatitur për dëshminë. Ky zhvillim ka ngritur pikëpyetje lidhur me integritetin e procesit, pasi Greenberg kishte punuar më parë në hetimin e komisionit për çështjen Epstein, përpara se të largohej nga detyra në dhjetor.
Sipas të njëjtit raport, Greenberg nuk do të marrë pjesë në dëshminë e Gates, pasi rregullat e etikës ndalojnë ish-anëtarët e stafit të Kongresit të punojnë drejtpërdrejt me ligjvënësit për një periudhë prej një viti pas largimit nga Capitol Hill.
