Presidenti i Shteteve të Bashkuara, Donald Trump, ka deklaruar se negociatat mes Uashingtonit dhe Teheranit kanë hyrë në fazën përfundimtare, duke lënë të kuptohet se një marrëveshje mund të arrihet brenda pak ditësh.
Duke folur para gazetarëve pas ndjekjes së një ndeshjeje të finales së NBA-së në Nju Jork, Trump u shpreh optimist për ecurinë e bisedimeve diplomatike mes dy vendeve.
“Jemi në fazat përfundimtare të asaj që do të jetë një marrëveshje shumë e mirë”, deklaroi presidenti amerikan, duke shtuar se dokumenti mund të finalizohet brenda “dy ose tre ditësh”.
Sipas Trump, negociatat po përparojnë dhe palët janë afër arritjes së një kompromisi. Ai ka përsëritur edhe në ditët e fundit se SHBA-ja dhe Irani ndodhen pranë një marrëveshjeje, ndërsa ka theksuar se prioritet mbetet garantimi që Teherani të mos zhvillojë armë bërthamore dhe rikthimi i stabilitetit në rajon.
Megjithatë, zyrtarët iranianë kanë mbajtur një qëndrim më të rezervuar, duke theksuar se ende nuk është arritur një marrëveshje përfundimtare dhe se disa çështje të rëndësishme vazhdojnë të mbeten objekt diskutimi.
Deklaratat e Trump vijnë në një moment kur përpjekjet diplomatike për uljen e tensioneve në Lindjen e Mesme janë intensifikuar, ndërsa komuniteti ndërkombëtar po ndjek me vëmendje zhvillimet që mund të ndikojnë në sigurinë dhe stabilitetin e rajonit.
