Presidenti amerikan Donald Trump ka deklaruar se Shtetet e Bashkuara nuk do të zhbllokojnë asetet e ngrira të Iranit dhe nuk do të heqin sanksionet ekzistuese pa arritjen e një marrëveshjeje paqeje.
Në një intervistë për NBC News, Trump theksoi se çdo lehtësim i masave ndaj Teheranit do të shqyrtohet vetëm pas një marrëveshjeje konkrete. “Nëse sillen mirë, nëse bëjnë një punë të mirë, ne fillojmë të flasim”, u shpreh ai.
Sipas presidentit amerikan, SHBA nuk po kërkon që Libani të përfshihet në një marrëveshje afatshkurtër me Iranin. Megjithatë, burime të cituara nga Reuters bëjnë të ditur se administrata amerikane po shqyrton mundësinë e përdorimit të aseteve të sekuestruara iraniane për të financuar dëmet e shkaktuara ndaj vendeve aleate në Gjirin Persik.
Arabia Saudite, Emiratet e Bashkuara Arabe, Katari, Kuvajti, Bahreini dhe Omani kanë raportuar sulme të ndryshme të lidhura me Iranin që nga përshkallëzimi i tensioneve në rajon.
Ndërkohë, Sekretari amerikan i Thesarit, Scott Bessent, raportohet se ka udhëzuar ekipet e tij të vlerësojnë kostot e dëmeve, si dhe mundësinë e përdorimit të aseteve të ngrira për kompensime të mundshme në të ardhmen.
