Kryeministri i ri i Hungarisë, Peter Magyar, ka deklaruar se fundi i epokës së Viktor Orbánit erdhi në momentin kur qytetarët nuk kishin më frikë nga pushteti dhe filluan ta sfidonin hapur atë.
Në një intervistë për revistën gjermane Der Spiegel, Magyar tregoi se vetëm dy vite më parë nuk kishte asnjë ambicie për t’u përfshirë në politikë. Ish-anëtari i partisë Fidesz tha se u shkëput nga sistemi i ndërtuar nga Orbán dhe nisi angazhimin publik pas një interviste që tërhoqi miliona shikues.
“Fillimisht nuk doja të hyja në politikë. Në shkurt të vitit 2024 dhashë një intervistë që u ndoq nga pothuajse tre milionë njerëz. Më pas organizova një protestë kundër korrupsionit dhe klientelizmit ku morën pjesë 50 mijë qytetarë. Tre javë më vonë ishin 200 mijë. Ndoshta aty kuptova se ndryshimi ishte i mundur”, tha ai.
Sipas Magyarit, pas 16 vitesh qeverisjeje të Orbánit, qytetarët u lodhën nga propaganda, korrupsioni dhe mungesa e transparencës.
“Hungarezët janë të durueshëm, por e duan lirinë. Kishte shumë gënjeshtra, shumë korrupsion dhe shumë propagandë. Ne u paraqitëm si një forcë e re që nuk ishte pjesë e sistemit dhe që premtoi qeverisje të ndershme”, u shpreh ai.
