Presidenti i Shteteve të Bashkuara, Donald Trump, ka lënë të kuptohet për një hapje të mundshme ndaj aleatëve evropianë, pas tensioneve të fundit transatlantike të shkaktuara nga zhvillimet rreth Iranit dhe në prag të samitit të G7, që do të mbahet javën e ardhshme në Evian të Francës.
Në një intervistë të shkurtër për Corriere della Sera, Trump u pyet nëse vendet evropiane mund të luanin një rol pas nënshkrimit të memorandumit të mirëkuptimit me Iranin. “Ata mund të jenë shumë të dobishëm më vonë. Ata mund të jenë shumë të dobishëm në të ardhmen. Por nuk kanë qenë të dobishëm tani”, deklaroi presidenti amerikan.
Një natë më parë, në një prononcim për median italiane La7, Trump e kishte cilësuar samitin e G7 si “të parëndësishëm” në përpjekjet për arritjen e paqes me Iranin, duke shprehur bindjen se një zgjidhje është pranë.
I pyetur nga Corriere della Sera për pritshmëritë e tij nga samiti në Francë, kreu i Shtëpisë së Bardhë shmangu dhënien e detajeve konkrete. Takimi i G7 do të shënojë gjithashtu edhe përballjen e parë mes Trump dhe kryeministres italiane Giorgia Meloni, pas sinjaleve të ftohta që presidenti amerikan kishte dhënë ndaj saj në një intervistë të muajit prill.
Sipas raportimeve, përveç çështjes së Iranit, në samitin e G7 pritet të diskutohen edhe tema të tjera të rëndësishme, përfshirë luftën në Ukrainë dhe marrëdhëniet tregtare ndërkombëtare. Një rol i mundshëm i vendeve evropiane mund të lidhet edhe me operacionet për pastrimin e minave dhe rihapjen e Ngushticës së Hormuzit.
I pyetur nëse pret zhvillime pozitive nga bashkëpunimi me aleatët evropianë, Trump u përgjigj shkurt: “Nuk kam ide. Varet prej tyre.”
