Izraeli ka ndërmarrë sulme ajrore në jug të Libanit, pasi më herët u bëri thirrje banorëve të largoheshin nga rreth 20 zona të ndryshme, raportojnë mediat shtetërore libaneze.
Sipas agjencisë shtetërore të lajmeve në Liban, të paktën një person ka humbur jetën pas një sulmi në qytetin Marrakeh, në distriktin e Tiros.
Sulmet vijnë në një moment kur ministri i Jashtëm i Iranit, Seyed Abbas Araghchi, deklaroi se një marrëveshje për t’i dhënë fund luftimeve me SHBA-në është pranë finalizimit. Sipas tij, pakti parashikon gjithashtu përfundimin e konfliktit mes Izraelit dhe Hezbollah në Liban.
Ndërkohë, kryeministri i Izraelit kishte paralajmëruar më herët se vendi i tij do të godiste Hezbollahun nëse grupi vazhdonte sulmet ndaj veriut të Izraelit. Araghchi deklaroi gjithashtu se marrëveshja përfshin rihapjen e kanalit të Hormuzit një prej rrugëve më të rëndësishme detare për transportin global të naftës dhe gazit të lëngshëm natyror, si dhe heqjen e bllokadës amerikane ndaj Iranit. Megjithatë, ai sqaroi se negociatat për programin bërthamor iranian do të nisin në një fazë të mëvonshme.
Zyrtarë amerikanë kanë konfirmuar disa elemente të marrëveshjes, duke theksuar se përfitimet ekonomike për Teheranin do të varen nga respektimi i detyrimeve të marra nga Irani.
Konflikti aktual nisi më 28 shkurt, kur SHBA-ja dhe Izraeli kryen sulme ndaj objektivave në Iran. Në përgjigje, Irani sulmoi Izraelin dhe shtete aleate të SHBA-së në Gjirin Persik, ndërsa praktikisht bllokoi Ngushticën e Hormuzit.
Megjithëse në prill u arrit një armëpushim, SHBA-ja dhe Irani kanë vazhduar shkëmbimet sporadike të sulmeve, përfshirë dy raunde goditjesh reciproke gjatë kësaj jave.
Presidenti amerikan Donald Trump deklaroi të enjten se kishte anuluar sulme të planifikuara kundër Iranit, pasi negociatorët kishin arritur një marrëveshje të rëndësishme që, sipas tij, mund të nënshkruhet shumë shpejt.
Sipas zyrtarëve amerikanë, marrëveshja do të mundësojë rihapjen e Ngushticës së Hormuzit në këmbim të heqjes së bllokadës amerikane ndaj transportit detar iranian. Më pas do të nisë një periudhë 60-ditore negociatash që do të fokusohet te rezervat e uraniumit të pasuruar të Iranit.
Shtetet e Bashkuara kërkojnë që materiali bërthamor i pasuruar të shkatërrohet dhe të largohet nga territori iranian, ndërsa detajet teknike të këtij procesi mbeten ende në diskutim.
Nga ana ekonomike, Uashingtoni ka bërë të qartë se nuk do të ketë fonde të menjëhershme për Iranin. Në vend të kësaj, heqja e sanksioneve dhe rikthimi gradual i Iranit në ekonominë globale do të bëhen në mënyrë të shkallëzuar, në varësi të zbatimit të marrëveshjes.
Megjithatë, brenda strukturave drejtuese iraniane vazhdojnë debatet mbi kushtet e paktit. Araghchi tha se ende nuk është marrë një vendim përfundimtar nga Këshilli Suprem i Sigurisë Kombëtare të Iranit, ndërsa nënvizoi se marrëveshja mund të nënshkruhet sapo të marrë miratimin përfundimtar.
