Ish-kryeministri hungarez Viktor Orbán është rizgjedhur në krye të partisë opozitare Fidesz, vetëm pak muaj pasi humbi pushtetin në zgjedhjet parlamentare të 12 prillit.
Në kongresin e partisë të zhvilluar këtë të shtunë, 729 nga 737 delegatë votuan në favor të Orbanit, duke i siguruar atij mbi 98% të votave. Nuk pati asnjë kandidat rival për postin e kryetarit.
Rezultati vjen në një moment kur e ardhmja politike e Orbanit ishte vënë në diskutim pas humbjes së zgjedhjeve ndaj partisë së qendrës së djathtë Tisza. Për herë të parë që nga ardhja e tij në pushtet në vitin 2010, disa ish-bashkëpunëtorë dhe mbështetës të tij kishin kërkuar publikisht largimin nga drejtimi i partisë.
Megjithatë, votimi i kongresit tregoi se kontrolli i Orbanit mbi strukturat e Fidesz mbetet pothuajse i plotë, pavarësisht humbjes elektorale. Rizgjedhja e tij me një shumicë dërrmuese dhe mungesa e një gare reale për drejtimin e partisë kanë nxitur krahasime me liderë të tjerë politikë në rajon, të cilët edhe pas humbjeve zgjedhore kanë ruajtur kontrollin absolut mbi partitë që drejtojnë.
Fidesz kalon kështu në opozitë me të njëjtin lider në krye, ndërsa Orban synon të rindërtojë partinë dhe të përgatitet për sfidat e ardhshme politike në Hungari.
