Gjykata e Posaçme ka lënë në fuqi masën e sigurisë “arrest në burg” për Orest Sotën, Orgest Birçajn dhe Dritan Agën, të arrestuar në kuadër të megaoperacionit të SPAK kundër dy grupeve të dyshuara për trafik ndërkombëtar droge dhe pastrim parash.
Për Edmond Jaupin, GJKKO vendosi masën “arrest shtëpie”, ndërsa Gëzim Islami është liruar kundrejt një garancie pasurore prej 100 mijë eurosh.
Pesë të dyshuarit dolën para gjykatës për verifikimin e masave të sigurisë. Seanca nisi në orën 09:00 dhe u ndërpre për rreth dy orë, pasi avokatët mbrojtës kërkuan kohë për t’u njohur me aktet hetimore.
Gjatë seancës, të pandehurit kundërshtuan akuzat e ngritura nga SPAK, duke pretenduar se nuk kanë përdorur aplikacionin e koduar SKY ECC, mbi të cilin mbështetet një pjesë e rëndësishme e hetimit.
