Policia e Korçës ka reaguar në lidhje me incidentin e ndodhur mbrëmjen e djeshme në rrethrrotullimin e Mirasit, në Bilisht, ku janë përfshirë dy vëllezër, Alti dhe Bledjon Nallbati, ky i fundit kandidat për deputet i Partisë Demokratike.
Sipas njoftimit zyrtar, është arrestuar në flagrancë Alti Nallbati, 42 vjeç, banues në Devoll, për veprat penale “Dëmtime të tjera me dashje”, “Prishja e qetësisë publike” dhe “Pengimi i qarkullimit të mjeteve të transportit”. Sipas hetimeve dhe pamjeve filmike, ai ka ndaluar automjetin në mes të rrugës duke penguar qarkullimin, ka zbritur dhe ka debatuar ashpër me një drejtues kamioni, shtetasin S.D., duke tentuar ta zbresë me forcë dhe ta godasë.
Në konflikt është përfshirë edhe vëllai i tij, Bledjon Nallbati, i cili fillimisht ka tentuar të qetësojë situatën, por më pas, siç rezulton nga pamjet, ka ndërhyrë dhe ai për të zbritur shoferin nga mjeti me forcë.
Burime nga vendngjarja bëjnë me dije se përplasja ka ndodhur për motive të dobëta, pasi sipas deklarimeve të dy vëllezërve, shoferi i kamionit po udhëtonte me shpejtësi dhe rrezikoi t’i godiste.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme.
