Policia e Fierit, në bashkëpunim me Forcën e Posaçme Operacionale dhe Ambasadën Italiane në Tiranë, ka finalizuar me sukses operacionin “Fast Reaction”, duke arrestuar një 27-vjeçar që dhunonte dhe mbante të mbyllur bashkëjetuesen e tij italiane.
Ngjarja ka ndodhur në fshatin Cakran, ku i riu, me iniciale A. I., e kishte mbajtur vajzën për disa ditë në banesën e tij, pa dëshirën e saj. Ai ka qenë më parë i dënuar për dhunë në familje dhe vjedhje.
Policia ndërhyri menjëherë pas njoftimit nga Zyra e Ekspertit të Sigurisë pranë Ambasadës Italiane, e cila informoi se një shtetase italiane mbahej e izoluar dhe dhunohej nga bashkëjetuesi.
I riu u kap në tentativë për t’u larguar me një makinë të marrë me qira. Vajza u mor në mbrojtje dhe iu dorëzua autoriteteve italiane në Shqipëri. Ajo ndodhet në gjendje të mirë shëndetësore.
Materialet për rastin iu referuan Prokurorisë së Fierit, ndërsa 27-vjeçari do të hetohet për veprën penale “Dhuna në familje”.
