Dy prej personave të plagosur në një sulm me armë zjarri në Laç ndodhen në gjendje të rëndë shëndetësore në Spitalin e Traumës. Bëhet fjalë për Amarildo Ndoj, 26 vjeç, dhe Geri Bitri, 24 vjeç. Tre personat e tjerë të plagosur – Liridon Ismaili, Daniel Gjeloshi dhe e moshuara Angjelina Gjezaj – janë jashtë rrezikut për jetën, me plagë në gjymtyrët e poshtme.
Ngjarja e rëndë ndodhi sot në mesditë, kur një person i armatosur me pistoletë qëlloi ndaj disa të rinjve, duke i lënë të plagosur. Një nga plumbat goditi edhe një grua të moshuar që shiste qirinj në trotuar.
Makina e përdorur nga autorët është gjetur e djegur në Balldre të Lezhës. Policia ka shoqëruar disa persona në lidhje me këtë ngjarje të rëndë dhe po vijon hetimet.
Reagimi i Policisë
Rreth orës 13.30, pranë ish-Gjykatës së Kurbinit, dyshohet se si pasojë e një konflikti të çastit midis disa personave, kanë mbetur të plagosur me armë zjarri shtetasit L. I., A. Gj., G. N., A. N, dhe D.Gj, të cilët janë dërguar menjëherë për ndihmë mjekësore më të specializuar në spitalin e Traumës në Tiranë. Me marrjen e njoftimit, shërbimet e Policisë kanë shkuar menjëherë në vendin ngjarjes, ku kanë bërë të mundur shoqërimin e disa personave dhe në ndihmë të Policisë Vendore kanë shkuar dhe Forcat Kombëtare të Sigurisë Njësia Shkodër. Grupi hetimor nën drejtimin e Prokurorisë po punon për sqarimin e plote të rrethanave të ngjarjes dhe dokumentimin ligjor të saj, si dhe për kapjen e shtetasit që qëlloi me armë gjatë konfliktit të çastit, i cili është identifikuar nga ana jonë dhe vijon puna për kapjen e tij.
