Zbardhet dinamika e ngjarjes së rëndë që tronditi Laçin, ku nga përplasja me armë mes disa të rinjve mbetën të plagosur pesë persona, mes tyre edhe një grua e moshuar që shiste qirinj në hyrje të rrugës që të çon te Kisha.
Ngjarja ndodhi rreth orës 13:30, në rrugën që lidh qytetin me Kishën e Laçit.
Sipas hetimeve paraprake të policisë, konflikti mes dy grupeve të të rinjve kishte nisur një natë më parë dhe ishte përshkallëzuar gjatë ditës së sotme. Të dyja palët po udhëtonin me automjete të ndryshme dhe, pasi janë përballur, kanë ndaluar makinat, kanë zbritur dhe kanë nxjerrë armët, duke qëlluar me to.
Si pasojë, kanë mbetur të plagosur Amarildo Ndoj, Liridon Ismaili, Daniel Gjeloshi dhe Geri Bitri. E plagosur ka mbetur gjithashtu edhe Angjelina Gjezaj, e cila ndodhej pranë vendit të ngjarjes duke shitur qirinj.
Sipas mjekëve, dy nga të plagosurit janë në gjendje të rëndë dhe ndodhen në Spitalin e Traumës.
Policia ka gjetur një nga armët e përdorura në vendin e ngjarjes. Ndërkohë, një automjet i djegur i gjetur në Balldre të Lezhës, fillimisht u dyshua se kishte lidhje me këtë ngjarje, por më vonë u konfirmua se nuk ka lidhje me të.
Sa i përket motivit të konfliktit, ai ende nuk është konfirmuar nga autoritetet.
