Prokuroria e Tiranës ka në dorë një profil ADN-je përmes të cilit mund të identifikojë autorin e dyshuar të vrasjes së biznesmenit Bujar Nasufi mbrëmjen e 12 janarit 2025 në rrugën “Myrte Zeneli” në afërsi të zonës së njohur si Pallati me Shigjeta në Tiranë.
Mbetjet biologjike janë zbuluar në një dorezë të përdorur nga autori, i cili pasi qëlloi me 6 plumba për vdekje 56-vjeçarin e dogji motorrin që përdori për të lëvizur para dhe pas krimit, si dhe sendet e tjera në zonën e Kombinatit në një nga tunelet e zonës. Hetuesit zbuluan një nga dorezat gjysmë të djegura dhe pikërisht aty është përftuar material biologjik dhe është përftuar një profil ADN-je.
Prokuroria e Tiranës ka kërkuar krahasimin e këtij profile me bazën e të dhënave të ADN-së së Interpolit për të konfirmuar nëse përputhet me profilin e ndonjë të skeduari për krime të tjera. Me vendim gjykate është vendosur krahasimi i këtij profili me nënën e dy vëllezërve nga Përmeti por me banim dhe aktivitet kriminal në Spanjë, si dhe me një kushëri të tyre, pasi janë ngritur dyshime se mund të kenë lidhje me vrasjen.
Biznesmeni Bujar Nasufi u ekzekutua poshtë banesës së tij teksa po parkonte automjetin. Ai u qëllua për vdekje në sy të gruas nga një person që lëvizte me një motorr që më vonë u gjet i djegur. Prokuroria po heton në disa pista, që nga konfliktet për pronësinë e deri tek ato për borxhet lidhur me vrasjen e biznesmenit.
