Pas 41 ditësh protestash, Edi Rama duket se ka ndryshuar ndjeshëm tonin. Nga deklaratat e javëve të fundit për algoritme, dezinformim dhe ndikime të jashtme, këtë herë kryeministri pranoi se protesta ka lindur mbi shqetësime reale të qytetarëve dhe se nuk është krijuar nga rrjetet sociale.
Duke folur në një takim në Jalë me të rinj, kryesisht nga Maqedonia e Veriut, të organizuar në ish-kampin e LSI-së, Rama tha se “protesta ka arsye që lidhen me të përditshmen e njerëzve… zjarri nuk është ndezur nga algoritmi, por nga njerëzit”, duke shtuar se algoritmet dhe videot e manipuluara vetëm sa e amplifikojnë pakënaqësinë dhe “i hedhin benzinë zjarrit”.
Ky është ndoshta korrigjimi më i qartë i narrativës së deritanishme. Për herë të parë, kryeministri e vendosi në plan të parë pakënaqësinë e qytetarëve, ndërsa ndikimin e algoritmeve dhe të asaj që ai i quan forca dashakeqe e la në rolin e faktorëve që, sipas tij, mund ta shfrytëzojnë një protestë, por jo ta krijojnë atë.
Rama u ndal edhe te protesta që nisi në Zvërnec, duke argumentuar se ajo humbi vrull pasi, sipas tij, faktet treguan se qeveria nuk kishte shitur Sazanin apo Zvërnecin. Ai përsëriti se shteti synon të jetë bashkëpronar në projekt dhe se ende nuk ka një marrëveshje përfundimtare.
Ironia është se, pas 41 ditësh debat mbi algoritmet, dezinformimin dhe “forcat armiqësore”, vetë Rama e përmblodhi situatën me një fjali që tingëllon shumë më ndryshe nga ato të javëve të fundit: “Zjarri nuk është ndezur nga algoritmi, por nga njerëzit.”
