Kur Erion Veliaj ishte kryetar i Bashkisë së Tiranës, një nga argumentet që përsëriste më shpesh ishte numri i pemëve të mbjella. Në çdo kritikë për trafikun, ndërtimet apo betonizimin, përgjigjja përfundonte pothuajse gjithmonë te pemët. Tani, në një farë mënyre, duket se të njëjtën rrugë po ndjek edhe Edi Rama.
Në prezantimin e programit “Rilindja Urbane 2.0”, me një fond të paralajmëruar prej 1.5 miliardë eurosh, kryeministri nuk u ndal vetëm te projektet e reja. Ai zgjodhi të rikthehej më shumë se dy dekada pas, në kohën kur drejtonte Bashkinë e Tiranës, duke kujtuar mbjelljen e pemëve në Rrugën e Kavajës. Sipas tij, në fillim të viteve 2000 qytetarët ndalonin për të parë mbjelljen e pemëve, ndërsa sot brezi i ri nuk e di se 90 për qind e pemëve përgjatë rrugëve të Tiranës janë mbjellë në atë periudhë.
Mesazhi politik është i qartë: qeveria kërkon ta paraqesë “Rilindjen Urbane 2.0” si vazhdimësi të transformimeve të nisura vite më parë. Por vetë krahasimi ngre edhe një pyetje: a është normale që pas më shumë se 25 vitesh në drejtimin e Bashkisë së Tiranës dhe të qeverisë, argumenti kryesor të mbeten ende pemët e mbjella në fillim të viteve 2000?
Në fjalën e tij, Rama foli për sheshet, rrugët, ndriçimin, shkollat, ujësjellësit dhe kanalizimet si arritje të fazës së parë të “Rilindjes Urbane”, duke argumentuar se tani sfida nuk është më ndërtimi i infrastrukturës bazë, por rritja e cilësisë së jetës në qytete. Për këtë arsye ai shpalli një program të ri me objektiv investimesh prej 1.5 miliardë eurosh.
Megjithatë, ndërsa qeveria prezanton një kapitull të ri investimesh, mbetet pyetja nëse qytetarët presin kujtime nga transformimet e para të Tiranës apo përgjigje për problemet e sotme: koston e jetesës, mungesën e strehimit të përballueshëm, trafikun, ndotjen, emigracionin dhe boshatisjen e qyteteve të vogla.
