Presidenti i FIFA-s, Gianni Infantino, ka hedhur idenë e një zgjerimi të ri të Kupës së Botës, duke mos përjashtuar mundësinë që në të ardhmen kompeticioni më prestigjioz i futbollit të zhvillohet me 64 kombëtare pjesëmarrëse.
Në një intervistë për “Blue Win”, kreu i qeverisë së futbollit botëror bëri të ditur se kjo çështje do të diskutohet pas përfundimit të Botërorit 2026, i cili do të jetë i pari në histori me formatin prej 48 skuadrash.
“Ky është padyshim një diskutim që do të shqyrtohet pas këtij Botërori”, deklaroi Infantino.
Sipas tij, Kupa e Botës duhet të ketë një përfaqësim sa më global dhe të mos jetë e kufizuar vetëm te fuqitë tradicionale të futbollit.
“Kur organizon një Kupë Bote, duhet ta organizosh për të gjithë botën, jo vetëm për Evropën dhe Amerikën e Jugut, por për të gjithë globin”, u shpreh presidenti i FIFA-s.
Infantino argumentoi se një zgjerim i mundshëm do t’u jepte më shumë mundësi kombëtareve të vogla për të konkurruar në skenën më të madhe të futbollit dhe për të mbajtur gjallë ëndrrën e pjesëmarrjes.
“Çdo komb duhet të ketë mundësinë të ëndërrojë se mund të marrë pjesë në Kupën e Botës”, tha ai.
Kreu i FIFA-s theksoi gjithashtu se niveli i futbollit është rritur ndjeshëm në të gjitha kontinentet dhe se më shumë vende duhet të kenë mundësinë të përballen me elitat e këtij sporti.
“Cilësia e skuadrave është shumë e lartë dhe po përmirësohet vazhdimisht në të gjithë botën. Nëse vendeve më të vogla nuk u jepet mundësia të luajnë në Kupën e Botës, atëherë atyre do t’u mungojë motivimi për të vazhduar përmirësimin”, shtoi Infantino.
Kupa e Botës u zgjerua nga 32 në 48 ekipe në edicionin e vitit 2026, ndërsa një format me 64 kombëtare mund të jetë një nga debatet më të mëdha të FIFA-s në vitet e ardhshme.
