Gjysmëfinalet e Kupës së Botës 2026 janë tashmë të plota, pas përfundimit të sfidave të fundit të çerekfinaleve më 12 korrik.
Anglia siguroi një vend mes katër më të mirave të turneut pas një përballjeje dramatike ndaj Norvegjisë, të cilën e fitoi me rezultatin 2-1 në kohën shtesë. Ndërkohë, Argjentina mposhti Zvicrën 3-1, po në minutat shtesë, duke kompletuar edhe çiftet gjysmëfinaliste.
Në garën për një biletë në finalen e madhe do të përballen Franca me Spanjën, ndërsa në sfidën tjetër do të luajnë Anglia dhe Argjentina. Katër kombëtare që prej vitesh konsiderohen ndër më të fuqishmet në futbollin botëror do të përplasen për trofeun më prestigjioz.
Sipas statistikave të publikuara nga “Squawka”, kjo është hera e parë në historinë e Kupës së Botës që katër skuadrat e para të renditjes FIFA arrijnë njëkohësisht në fazën gjysmëfinale të turneut.
Aktualisht, Franca kryeson renditjen botërore të FIFA-s me 1948.97 pikë, e ndjekur nga Argjentina, Spanja dhe Anglia.
Renditja aktuale e FIFA-s:
Franca – 1948.97 pikë
Argjentina – 1943.47 pikë
Spanja – 1934.79 pikë
Anglia – 1889.42 pikë
Megjithatë, para nisjes së Botërorit 2026, renditja ishte ndryshe. Në klasifikimin e publikuar më 11 qershor 2026, Argjentina ishte në krye, ndërsa Franca pozicionohej në vendin e tretë.
Renditja para Botërorit 2026:
Argjentina – 1877.27 pikë
Spanja – 1874.71 pikë
Franca – 1870.70 pikë
Anglia – 1828.02 pikë
Me këto dy përballje, Botërori 2026 garanton dy gjysmëfinale spektakolare mes katër kombëtareve që aktualisht dominojnë futbollin ndërkombëtar.
