Gjykata e Lartë ka thirrur Mbledhjen e Përgjithshme të Gjyqtarëve për të diskutuar lidhur me zgjidhjen e ngërçit të krijuar për pagat e magjistratëve dhe administratës gjyqësore.
Vendimi është marrë pas një takimi të zhvilluar në Gjykatën e Lartë, me pjesëmarrjen e kryetarëve të gjykatave, ku është diskutuar situata e krijuar në sistemin gjyqësor pas moszbatimit brenda afatit të vendimit nr. 15/2026 të Gjykatës Kushtetuese për pagën e magjistratëve.
Në njoftimin e Gjykatës së Lartë thuhet se situata është krijuar edhe si pasojë e bllokimit, nga strukturat shtetërore përgjegjëse për administrimin e buxhetit, të pagave të gjyqtarëve dhe administratës gjyqësore.
Gjykata e Lartë e vlerëson këtë situatë si veçanërisht serioze dhe shqetësuese, pasi prek drejtpërdrejt funksionimin normal të gjykatave, garancitë kushtetuese të statusit të gjyqtarit, pavarësinë dhe integritetin institucional të pushtetit gjyqësor, si dhe autoritetin detyrues të vendimeve të Gjykatës Kushtetuese.
Mbledhja është thirrur me qëllim zhvillimin e një diskutimi të hapur mes gjyqtarëve të të gjitha niveleve për respektimin dhe zbatimin e vendimit të Gjykatës Kushtetuese, mbrojtjen e pavarësisë së gjyqësorit dhe përcaktimin e qëndrimit dhe hapave institucionalë që çmohen të nevojshëm për zgjidhjen e situatës.
Në rendin e ditës është parashikuar diskutimi i situatës së krijuar nga bllokimi i pagave të gjyqtarëve dhe administratës gjyqësore, si dhe përcaktimi i qëndrimit institucional të trupës gjyqësore për zgjidhjen e saj, në përputhje me vendimin nr. 15/2026 të Gjykatës Kushtetuese, Kushtetutën dhe garancitë e pavarësisë së pushtetit gjyqësor.
Mbledhja e Përgjithshme e Gjyqtarëve do të zhvillohet të enjten, më 10 shtator 2026, në orën 10:00, në ambientet e Këshillit të Lartë Gjyqësor.
