Prej kësaj të marte, në Gjykatën e Posaçme kundër Korrupsionit dhe Krimit të Organizuar hyn në fuqi Rregullorja e re, e cila vendos kufizime të reja për mediat dhe redukton ndjeshëm hapësirat që gazetarët kishin deri më tani për të marrë dhe përcjellë informacion nga proceset gjyqësore.
Rregullorja, e hartuar nën drejtimin e kryetarit të komanduar të GJKKO-së, Erion Bani, hyn në fuqi pavarësisht kundërshtimeve të ngritura nga komuniteti i gazetarëve, shoqatat e medias dhe organizata ndërkombëtare. Kritikat janë përqendruar veçanërisht te kufizimi i aksesit në informacion dhe te pikëpyetjet që këto masa ngrenë në raport me transparencën e një institucioni që trajton disa prej çështjeve me interesin më të lartë publik në vend.
Pavarësisht shqetësimeve të bëra publike, drejtuesit e Gjykatës nuk reflektuan ndryshime thelbësore në dokument përpara hyrjes së tij në fuqi. Rregullorja mbeti kështu në formën e miratuar, duke hapur një kapitull të ri në marrëdhënien mes GJKKO-së dhe medias.
Edhe Këshillit të Lartë Gjyqësor rregullorja iu përcoll për mendim vetëm pasi ishte miratuar. E njëjta procedurë u ndoq edhe ndaj Apelit të Posaçëm, institucion me të cilin GJKKO ndan të njëjtat ambiente.
Pikërisht kjo mënyrë veprimi ka shtuar pikëpyetjet nëse një rregullore që prek drejtpërdrejt aksesin në informacion duhej të kalonte më parë përmes një procesi më të gjerë konsultimi.
