Ndryshimet e propozuara në ligjin “Për mbrojtjen e tokës bujqësore” kanë shkaktuar përplasje të forta në Komisionin për Çështjet Ligjore, ku deputeti socialist Damian Gjiknuri ka bashkuar votat me opozitën kundër projektligjit.
Pika e nxehtë e diskutimit ishte instalimi i impianteve eolike në zonat bujqësore. Deputeti i Partisë Demokratike, Oerd Bylykbashi, ngriti shqetësimin se strukturat masive dhe shpimet për kullat e erës dëmtojnë në mënyrë të pariparueshme tokën.
Dyshime të ngjashme shfaqi edhe vetë Gjiknuri, i cili votoi kundër nenit të parë të prishmërisë ligjore. Edhe pse përfaqësuesit e institucioneve u përpoqën ta qetësonin komisionin duke pretenduar se këto impiante mund të ngrihen pa baza betoni, Gjiknuri u tregua skeptik: “Një kullë 100 metra e lartë për një park eolik nuk ka shans të vendoset pa strukturë betoni. Nuk jam i bindur me shpjegimet tuaja”.
Mbledhja u mbyll me tensione të larta kur deputeti Gent Strazimiri kërkoi të vazhdonte me pyetjet, por u ndërpre nga kryetari i komisionit, Ulsi Manja. Ky vendim solli një përplasje të dytë mes Manjës dhe Gjiknurit, që u përmbyll me largimin e këtij të fundit nga salla në shenjë proteste.
Ulsi Manja: Kush është dakord në tërësi?
Oerd Bylykbashi dhe Gent Strazimiri largohen.
Damian Gjiknuri: Ma jep fjalën të jap shpjegim.
Ulsi Manja: Jo jo rri tek abstenimi ti.
Damian Gjiknuri: Se u keqkuptove edhe ti.
Damian Gjiknuri: Ej, do ma japësh fjalën apo të iki fare?
Ulsi Manja: Po ik mo.
Damian Gjiknuri: Ehu muhabet kot, muhabet leshi.
Ulsi Manja: Ik, merru me Oerdin.
