Kreu i Grupit Parlamentar të PD, Gazment Bardhi, ka reaguar ndaj deklaratave të deputetit socialist, Ulsi Manja, lidhur me kallëzimin penal që Partia Demokratike depozitoi këtë të martë në SPAK ndaj kryeministrit Edi Rama.
Sipas Bardhit, kallëzimi nuk ka të bëjë me këngëtarin Kanye West, por me kryeministrin Rama, për të cilin opozita pretendon se ka shpërdoruar detyrën në lidhje me akordimin e 4.2 milionë eurove nga buxheti i shtetit për organizimin e një koncerti privat.
Në reagimin e tij në rrjetet sociale, Bardhi ironizon Manjën, duke thënë se ai "po luan rolin e budallait ose të servilit", ndërsa shton se deputeti socialist po deformon përmbajtjen e kallëzimit të opozitës.
"Ulsi, nuk kemi çuar në SPAK Kanin, por Edin. Sepse Edi ka shpërdoruar detyrën bashkë me 4.2 milionë euro para publike, të dhëna si pare xhepi për një koncert privat", shprehet Bardhi.
Më tej, deputeti demokrat ngre edhe dy pyetje publike drejtuar Manjës, duke e pyetur se çfarë lidhjeje ka me biznesmenin Paulin Rajta dhe nëse ka ndërhyrë pranë zëvendëskryeministres Belinda Balluku për t'i mundësuar këtij të fundit përfitimin e një hidrocentrali në qarkun Dibër.
Në vijim të reagimit, Bardhi pretendon se ndërhyrjet për dhënien e licencave në kundërshtim me ligjin përbëjnë vepër penale dhe paralajmëron Manjën se edhe ai mund të përballet me hetime nga Prokuroria e Posaçme.
Reagimi i Bardhit vjen pasi Partia Demokratike kallëzoi në SPAK kryeministrin Edi Rama, duke pretenduar se janë kryer shkelje ligjore në përdorimin e fondeve publike të destinuara për koncertin e Kanye West.
