Aktivisti Ilir Xhemalaj ka paralajmëruar zhvillime të rëndësishme politike në muajin shtator, teksa protesta para Kryeministrisë vijon prej 44 ditësh.
Në një lidhje live për emisionin “Off the Record” në A2 CNN, Xhemalaj deklaroi se protesta qytetare do të vijojë edhe në muajt e ardhshëm, ndërsa shprehu bindjen se presioni i saj do të sjellë ndryshime të rëndësishme politike.
“Protesta do të vazhdojë. Numrat besoj se janë të mirë. Do të vazhdojmë, në shtator presim ndryshime të mëdha, uroj edhe më shpejt, por besoj që shtatori do të na vijë me ndryshime të mëdha”, tha ai.
Sipas Xhemalajt, objektivi i protestës është kryeministri Edi Rama, të cilin ai e konsideron “jolegjitim”, duke theksuar se përballja e protestuesve është me qeverinë dhe sistemin politik.
Duke komentuar edhe debatin për vlerësimet negative ndaj bizneseve në platformat online, aktivisti u distancua nga kjo nismë, duke deklaruar se asnjë prej organizatorëve të protestës nuk ka nxitur veprime të tilla.
“Nuk kemi të bëjmë fare me këtë pjesë. Ne nuk sulmojmë askënd. Lufta jonë është me sistemin dhe me kryeministrin Rama”, deklaroi Xhemalaj.
Protesta para Kryeministrisë vijon prej 44 ditësh, ndërsa organizatorët kanë paralajmëruar vazhdimin e aksionit qytetar me synimin për të sjellë ndryshime në skenën politike.
