Gjithnjë fushatat zgjedhore shfaqin një gamë të gjerë prezantimi të kandidatëve me metoda nga më të ndryshmet.Me teknologjinë tashmë të kthyer në një mjet të fuqishëm për promovimin e programeve elektorale e komunikimin me votuesit, kandidatët po zgjerojnë audiencat dhe po rrisin ndërveprimin online. Por kreativiteti i fushatës duket se po kalon edhe në ekstreme.
Në përpjekje për të tërhequr vëmendjen publike, thirrjet për vota përmes spoteve me të sëmurë e deri në shpërblime financiare në atë që njihet në gjuhën e rrjeteve sociale si giveaway po kritikohet nga ndjekësit digjitalë.
Edona Bilali kandidatja socialiste publikoi sot në Facebook videon e saj të fushatës me një gjysh të shtruar në spital e nipin e shqetësuar, të cilët morën garancinë e doktorit për të jetuar deri në 11 maj për ti dhënë votën shkodranes. Video e cila nuk pati jetëgjatësi e pas një ore u fshi nga platforma sociale.
Po aq spikati ditë më parë kandidatja demokrate, Adriana Kalaja, që ofronte para publikisht për mbështetësit e saj në këmbim të votës, nga 200 deri në 1000 euro.
Videoja e cila u justifikua nga Sali Berisha.
Duket si një fushatë e cila që në nisje ka shkuar deri në shkelje, e sipas kodit zgjedhor parashikohen edhe dënime ligjore. Ndaj lind pyetja: Është kjo një strategji apo pakujdesi e kandidatëve të subjekteve zgjedhore për të rritur profilin politik?
Këto raste tregojnë se qasja e aspirantëve për deputetë në fushatat zgjedhore në Shqipëri shpeshherë kalon kufijtë e konvencionales, duke përdorur metoda të reja që synojnë të fitojnë votën e shqiptarëve, por që reagimi online duket se është i kundërt nga pritshmëritë e tyre, pasi po ngjallin debat mbi etikën dhe efektivitetin e përdorur në diskursin politik.
Top Channel
