Deputetja e PD, Jorida Tabaku, në një moment reflektimi mbi solidaritetin femëror në politikë, ka cituar me bindje: “Ka një vend në ferr për çdo grua që nuk mbështet një grua tjetër”, duke ia atribuar këtë shprehje Margaret Thatcher.
Vetëm se… zonja Thatcher, me gjithë famën e saj si “Zonja e Hekurt”, s’e ka thënë kurrë këtë. Autorja e vërtetë është Madeleine Albright, një liberale amerikane me profil krejt tjetër nga Thatcher, dhe me një qasje diametralisht të kundërt ndaj çështjeve të solidaritetit gjinor.
Albright e ka përdorur këtë frazë që në vitet ’90, por ajo u bë virale në një miting në mbështetje të Hillary Clinton gjatë fushatës presidenciale të vitit 2016. Ndërkohë që mesazhi i saj ishte një thirrje për bashkim mes grave, në emër të përparimit dhe mbështetjes reciproke, Margaret Thatcher ishte e njohur për një qasje më individualiste dhe madje skeptike ndaj ideve të feminizmit. Ajo ka deklaruar hapur: “Nuk i detyrohem asgjë lëvizjes së grave” — një qëndrim që e distancon qartazi nga retorika e Albright-it.
Për më tepër, vetë figura e Thatcher-it është përdorur shpesh për të ilustruar paradoksin e grave në pushtet që nuk e kanë parë si mision përfaqësimin apo ngritjen e grave të tjera. Ndaj edhe atribuimi i kësaj shprehjeje asaj, përtej pasaktësisë historike, përmban një kontrast të fortë ideologjik dhe etik.
