Kupa e Botës 2026 po shkon drejt aktit final dhe FIFA ka përgatitur një ceremoni madhështore për të mbyllur edicionin më të madh në historinë e turneut.
Ceremonia e mbylljes do të mbahet të dielën, më 19 korrik, në stadiumin e New Jersey, rreth 90 minuta para fillimit të finales së madhe. Dyert e impiantit do të hapen dy orë më herët, ndërsa tifozët do të kenë mundësi të ndjekin aktivitete dhe programe argëtuese përpara ndeshjes.
Një nga momentet kulmore të ceremonisë do të jetë interpretimi i himnit kombëtar të Shteteve të Bashkuara nga këngëtarja Jennifer Hudson, fituese e çmimeve Emmy, Grammy dhe Oscar.
Në skenë do të performojnë gjithashtu emra të njohur të muzikës botërore, mes tyre Laura Pausini, Nicole Scherzinger, Robbie Williams dhe ylli i internetit IShowSpeed, të cilët do të argëtojnë mijëra tifozët në stadium dhe miliona shikues në mbarë botën.
Pjesë e spektaklit pritet të jetë edhe aktori i famshëm Tom Cruise, i cili rikthehet në një ceremoni të madhe sportive pas paraqitjes së tij spektakolare në mbylljen e Lojërave Olimpike "Paris 2024", ku bëri bujë me hyrjen në stadium përmes një zip-line.
Organizatorët kanë bërë të ditur se lista e artistëve dhe të ftuarve specialë nuk është mbyllur ende, ndërsa emra të tjerë pritet të zbulohen në ditët në vijim.
