SPAK firmos masën e sigurisë “arrest në shtëpi” për Vlora Hysenin, ish-drejtoreshën e Shërbimit Informativ të Shtetit, e dyshuar për përfshirje në aferën e AKSHI-t. Masa e miratuar me vendim të GJKKO-së nuk është zbatuar, pasi “gruaja e sekreteve” nuk ndodhet në Shqipëri.
Në kuadër të të njëjtit aksion është kontrolluar banesa e ish-drejtorit të Përgjithshëm të Policisë së Shtetit, Ilir Proda. Si Hyseni, ashtu edhe Proda janë akuzuar shpesh për lidhje me Ergys Agasin, i dyshuar si kreu i një grupi kriminal që vepronte brenda AKSHI-t.
Agasi u arrestua pak javë më parë në Durrës, pas tetë muajsh në arrati, së bashku me Ulian Shpatarakun, ish-zyrtar policie. Për ta pritet që Apeli i Posaçëm të shpallë vendimin lidhur me masat e sigurisë.
Ndërsa në Francë u arrestua Ermal Beqiri, teksa pilotonte një avion civil mbi një central bërthamor. Ndërkohë, me masën e sigurisë “detyrim paraqitjeje” janë edhe ish-drejtoresha e AKSHI-t, Mirlinda Karçanaj, dhe ish-zëvendësdrejtoresha Hava Delibashi.
