Nëntë persona janë arrestuar në Zubin Potok, nën dyshimin për krime lufte kundër popullsisë civile, në kuadër të operacionit të koduar “Dosja 23”. Operacioni u zhvillua në orët e para të mëngjesit nga Drejtoria për Hetimin e Krimeve të Luftës e Policisë së Kosovës, me urdhër të Prokurorisë Speciale.
Sipas autoriteteve, operacioni lidhet me rastin e njohur si “Grupi i intelektualëve”, që ka të bëjë me zhdukjen e 23 shqiptarëve nga zona e Mitrovicës dhe Skenderajt gjatë luftës në Kosovë, më 19 prill 1999. Në kuadër të hetimeve për këtë rast, në zonën e Zubin Potokut janë zhvilluar edhe gërmime ku janë gjetur mbetje mortore që dyshohet se u përkasin viktimave të këtij grupi.
Prokuroria Speciale dhe Policia e Kosovës kanë bërë të ditur se për momentin nuk do të publikojnë detaje të tjera rreth të arrestuarve dhe veprimeve hetimore. Informacioni shtesë, sipas tyre, do të bëhet publik në momentin që mund të publikohet.
