Altin Krasniqi, djali i ish-kreut të UÇK-së, Jakup Krasniqi, ka bërë thirrje për bashkim të shqiptarëve dhe forcave politike, pas aktgjykimit të Dhomave të Specializuara të Kosovës në Hagë ndaj katër ish-drejtuesve të UÇK-së.
Duke folur para protestuesve në Prishtinë, Krasniqi deklaroi se vendimi i Hagës, sipas tij, nuk prek vetëm katër individët e dënuar, por edhe historinë dhe sakrificën e popullit të Kosovës.
Ai theksoi se familjarët dhe mbështetësit e ish-krerëve të UÇK-së do të vijojnë të kërkojnë drejtësi, duke deklaruar se nuk do të dorëzohen përballë vendimit të dhënë.
Krasniqi u bëri gjithashtu thirrje partive politike që të lënë mënjanë dallimet mes tyre dhe të bashkohen rreth kësaj çështjeje.
“Sot i bëj thirrje të gjithë shqiptarëve dhe të gjitha partive politike t’i lëmë anash dallimet politike, të bashkohemi”, deklaroi Krasniqi gjatë fjalës së tij.
