Presidenti i Serbisë, Aleksandar Vuçiç, ka reaguar pas vendimit të Dhomave të Specializuara të Kosovës në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit. Në një konferencë për mediat, ai u ndal veçanërisht te reagimet e drejtuesve politikë në Shqipëri, Kosovë, Mal të Zi dhe Maqedoninë e Veriut, duke pretenduar se ato dëshmojnë standarde të ndryshme në mënyrën se si trajtohen krimet e luftës në rajon.
Sipas Vuçiçit, Serbia nuk ka arsye as për të festuar dhe as për t’u trishtuar pas vendimit, ndërsa argumentoi se një pjesë e akuzave më të rënda nuk çuan në shpalljen e tyre fajtorë.
Presidenti serb e përqendroi një pjesë të konsiderueshme të deklaratës së tij te reagimet që erdhën nga udhëheqës dhe zyrtarë të lartë politikë të vendeve të rajonit.
Vuçiç tha se kishte pritur reagimet e tyre përpara se të dilte publikisht, duke argumentuar se ato tregonin, sipas tij, standarde të dyfishta në mënyrën se si trajtohen serbët dhe popujt e tjerë të ish-Jugosllavisë.
Një nga reagimet e para që Vuçiç komentoi ishte ai i Presidentit të Shqipërisë, Bajram Begaj. Pas vendimit të Hagës, Begaj shprehu “trishtim të thellë” dhe përshëndeti vendosmërinë për apelimin e tij.
“Për shqiptarët, askush dhe asgjë nuk njollos UÇK-në! Liria ka emër”, deklaroi Presidenti shqiptar.
Duke iu referuar pikërisht kësaj deklarate, Vuçiç bëri një krahasim me ish-zyrtarët serbë të dënuar nga Tribunali i Hagës.
“Imagjinoni sikur një nga zyrtarët tanë të thoshte: ‘Liria ka një emër’ dhe të përmendte ndonjë serb të dënuar nga Tribunali i Hagës”, deklaroi Vuçiç.
Vuçiç u ndal gjithashtu te qëndrimi i kryeministrit të Shqipërisë, Edi Rama.
Menjëherë pas shpalljes së vendimit, Rama publikoi në rrjetet sociale një imazh ku shkruhej me shkronja të mëdha fjala “MARRE”, ndërsa reagimi i tij u raportua gjerësisht si një dënim i vendimit të Hagës.
Kryeministri shqiptar e përshkroi vendimin me fjalën “turp”. Reagimet e drejtuesve të Shqipërisë ishin pjesë e argumentit të Vuçiçit se në rajon ekziston një qasje e ndryshme ndaj vendimeve për krimet e luftës, në varësi të përkatësisë kombëtare të personave të dënuar.
Presidenti serb komentoi gjithashtu reagimin e kryeministrit të Kosovës, Albin Kurti.
Kurti e cilësoi dënimin e katër ish-drejtuesve të UÇK-së si një “padrejtësi të papranueshme” dhe një ndëshkim të rëndë e të dëmshëm.
Një tjetër deklaratë që tërhoqi vëmendjen e Vuçiçit ishte ajo e zëvendëskryeministrit shqiptar të Malit të Zi, Nik Gjeloshaj.
Gjeloshaj e cilësoi vendimin e Hagës si “jashtëzakonisht të padrejtë”, duke shprehur bindjen se procesi nuk ka përfunduar dhe se vendimi mund të rrëzohet në instancat më të larta. Vuçiç e përdori reagimin e zëvendëskryeministrit malazez për të ngritur pyetjen nëse deklarata të tilla do të ndikojnë në procesin e integrimit të Malit të Zi në Bashkimin Evropian.
“A do ta ndalojnë integrimin evropian sepse e fyejnë vendimin, e mohojnë sundimin e ligjit? Apo kjo vlen vetëm për serbët?”, pyeti Vuçiç.
Deklarata ishte një kritikë e drejtpërdrejtë ndaj asaj që presidenti serb e konsideron trajtim të pabarabartë të Serbisë krahasuar me vendet e tjera të rajonit.
Vuçiç iu referua gjithashtu reagimeve të politikanëve shqiptarë në Maqedoninë e Veriut, mes tyre Bekim Sali, kryetari i Kuvendit Afrim Gashi dhe kreu i BDI-së, Ali Ahmeti.
Ahmeti e cilësoi vendimin si të padrejtë dhe thellësisht zhgënjyes. Duke komentuar mbështetjen e shprehur për ish-drejtuesit e UÇK-së, Vuçiç përdori një ton ironik.
“Dhe unë mendova se ata janë kriminelë, të paktën të dënuar në shkallën e parë. Jo, të gjithë janë çlirimtarë, heronj dhe heroina”, deklaroi presidenti serb.
Vuçiç iu referua gjithashtu qëndrimit të diplomacisë kroate ndaj vendimit.
Sipas tij, Zagrebi deklaroi se e “merr në dijeni” vendimin, por në të njëjtën kohë vuri theksin te konteksti politik dhe historik i luftës në Kosovë.
Presidenti serb i paraqiti të gjitha këto reagime si dëshmi të asaj që ai e konsideron standard të dyfishtë ndaj Serbisë dhe serbëve kur bëhet fjalë për përgjegjësinë për krimet e kryera gjatë konflikteve në ish-Jugosllavi.
“Serbët duhet të jenë kriminelë në çdo njoftim, në çdo deklaratë”, tha Vuçiç.
