Kryeministri i Kosovës, Albin Kurti, ka reaguar ashpër pas vendimit të Dhomave të Specializuara në Hagë ndaj katër ish-krerëve të Ushtrisë Çlirimtare të Kosovës, duke e cilësuar dënimin e tyre si një “padrejtësi të papranueshme”.
Kurti kundërshtoi aktgjykimin ndaj Hashim Thaçit, Kadri Veselit, Rexhep Selimit dhe Jakup Krasniqit, ndërsa kërkoi që vendimi të ndryshohet në shkallën e Apelit.
“Shpallja fajtorë dhe dënimi kaq i rëndë për katër ish-krerë të Ushtrisë Çlirimtare të Kosovës, Hashim Thaçi, Kadri Veseli, Rexhep Selimi dhe Jakup Krasniqi, është padrejtësi e papranueshme, ndëshkim i madh dhe i dëmshëm”, deklaroi Kurti.
Kreu i qeverisë së Kosovës u ndal edhe te fakti se aktgjykimi është shqiptuar formalisht në emër të popullit të Kosovës, duke kundërshtuar që kjo të interpretohet si shprehje e vullnetit të qytetarëve.
“Aktgjykimi mund të jetë shqiptuar formalisht në emër të popullit të Kosovës, por kjo formulë e zbrazët nuk duhet ngatërruar me vullnetin e popullit”, theksoi ai.
Kurti kërkoi që çështja të korrigjohet në fazën e Apelit, duke shprehur njëkohësisht mbështetjen për familjet e katër ish-drejtuesve të UÇK-së dhe bashkëluftëtarët e tyre.
“Ky aktgjykim patjetër duhet ndryshuar dhe korrigjuar në shkallën e Apelit dhe atë sa më parë. Në këto momente të vështira, jemi pranë familjeve të ish-krerëve të UÇK-së dhe të gjithë bashkëluftëtarëve çlirimtarë”, përfundoi Kurti.
