Lëvizja qytetare kundër klasës politike hyri në ditën e 42-të të protestës. Protestuesit u mblodhën fillimisht në sheshin “Skënderbej” dhe më pas marshuan drejt Kryeministrisë, ku përsëritën thirrjet për largimin e kryeministrit Edi Rama dhe ish-kryeministrit Sali Berisha, duke i konsideruar të dy përgjegjës për situatën politike dhe ekonomike në vend.
Gjatë tubimit, protestuesit theksuan se nuk do të tërhiqen deri në realizimin e kërkesave të tyre, ndërsa kërkuan pjesëmarrje më të madhe qytetare dhe mbështetje nga intelektualët.
Aktori Mehdi Malkaj akuzoi qeverinë se nuk ka mbajtur premtimet e saj për shëndetësinë, arsimin dhe mirëqenien e qytetarëve. “Ku është shëndetësia falas? Ku është arsimi model? Ku janë pensionistët që do të gëzonin?”, u shpreh ai, duke shtuar se protestuesit “kanë vrarë frikën”.
Nga ana tjetër, aktivisti Arbër Lleshi deklaroi se protesta do të vazhdojë deri në dorëheqjen e Edi Ramës. Ai kritikoi vendimin e qeverisë për financimin e koncertit të Kanye West me 4.2 milionë euro, ndërsa, sipas tij, infrastruktura dhe shërbimet për qytetarët mbeten të lëna pas dore. Lleshi akuzoi gjithashtu qeverinë për korrupsion dhe tha se Parlamenti është kthyer në një institucion të izoluar nga qytetarët.
Një tjetër protestues bëri thirrje për zgjerimin e lëvizjes, duke ftuar intelektualët t’i bashkohen protestës fizikisht dhe jo vetëm përmes deklaratave publike. “Jam i gatshëm të rri edhe 420 ditë të tjera derisa kjo klasë politike të largohet. Ky sistem nuk na përfaqëson”, u shpreh ai.
