Pasi priti disa javë për të kompletuar strukturën drejtuese të Partisë Demokratike pas zgjedhjes së kryesisë, Sali Berisha ka thirrur më 15 korrik, në orën 18:00, mbledhjen e Këshillit Kombëtar, ku do të zgjidhen Sekretari i Përgjithshëm, nënkryetarët, Sekretariati i PD-së dhe Komisioni i Apelimit.
Mbledhja pritet të jetë testi i parë real i ekuilibrave të rinj brenda partisë, pasi përmes emrave që do të propozohen dhe votohen do të kuptohet se cilët do të jenë njerëzit që do të mbajnë peshën politike dhe organizative të PD-së në muajt e ardhshëm.
Një nga sinjalet që vetë Berisha ka dhënë është se gratë do të kenë një rol më të rëndësishëm në drejtimin e partisë. Në këtë kuadër, një nga emrat që përflitet për postin e nënkryetares është Albana Vokshi. Nëse kjo kandidaturë konfirmohet dhe votohet, ajo do të largohej nga drejtimi i Forumit të Gruas së Partisë Demokratike, post që e mban prej rreth dy dekadash pa garë zgjedhore. Një zhvillim i tillë do t’i hapte rrugën për herë të parë pas shumë vitesh një procesi zgjedhor edhe për drejtimin e Forumit të Gruas.
Pikëpyetja më e madhe mbetet posti i Sekretarit të Përgjithshëm, një nga funksionet më të rëndësishme në organizimin e partisë. Në qarqet demokratike përmenden dy emra kryesorë: Flamur Noka dhe Belind Këlliçi.
Këlliçi ka rritur dukshëm profilin e tij politik gjatë muajve të fundit dhe konsiderohet nga shumë demokratë si një prej figurave me më shumë energji politike në opozitë. Megjithatë, nëse vendimi do të bazohet te modeli që Berisha ka ndjekur ndër vite, Flamur Noka mbetet favorit. Ai është një nga bashkëpunëtorët më të afërt dhe më besnikë të Berishës, duke gëzuar prej kohësh besimin e kryetarit të PD-së në momentet më të rëndësishme politike.
Përtej emrave, vendimet e 15 korrikut do të japin një sinjal të qartë për drejtimin që Berisha synon t’i japë Partisë Demokratike: nëse do të mbështetet kryesisht te bashkëpunëtorët e vjetër apo nëse do t’u japë më shumë hapësirë figurave të reja që kanë fituar peshë politike gjatë viteve të fundit. Për këtë arsye, mbledhja e Këshillit Kombëtar pritet të jetë shumë më tepër sesa një procedurë statutore; ajo do të jetë prova e parë e arkitekturës së re drejtuese të opozitës.
