Çështja e mandatit të deputetes Olta Xhaçka dhe opinioni i Komisionit të Venecias shkaktoi debat në Kuvendin e Shqipërisë.
Kreu i Grupit Parlamentar të Partisë Demokratike, Gazment Bardhi, akuzoi mazhorancën për shmangie të vendimeve të Gjykatës Kushtetuese dhe për manipulim të opinionit të Komisionit të Venecias, ndërsa kreu i Grupit Parlamentar të Partisë Socialiste, Niko Peleshi, mbrojti qëndrimin e mazhorancës, duke theksuar se opinioni i Venecias ishte pozitiv për të gjithë palët.
Gjatë fjalës së tij, Gazment Bardhi theksoi se mazhoranca kishte premtuar se do të zbatonte opinionin e Komisionit të Venecias, por në vend të kësaj shpiku një opinion të rremë dhe shpërndau lajme të pavërteta.
“Ju jeni e vetmja mazhorancë që në 34 vite keni hedhur dy vendime të Gjykatës Kushtetuese në kosh. Çfarë shembulli u jepni ju qytetarëve që kanë një konflikt gjyqësor? U thoni, po ju pëlqeu një vendim gjykate, zbatojeni, po nuk ju pëlqeu, shpallni ‘Republikën Xhaçka’ dhe mos e zbatoni vendimin e gjykatës. Për turpin tuaj, u zotuat publikisht se do të zbatonit opinionin e Komisionit të Venecias. Çfarë bëtë? Shpikuat një opinion që nuk ekziston dhe shpërndatë lajme të rreme pa asnjë dokument e bazë,” deklaroi Bardhi.
Ai kërkoi që çështja e Olta Xhaçkës të futet menjëherë në rend dite dhe t’i dërgohet Gjykatës Kushtetuese për vendim përfundimtar. “Komisioni i Venecias ka thënë atë që ne kemi thënë në këtë sallë dhe atë që ka thënë Gjykata Kushtetuese. Nuk mund të shmangni përgjegjësinë për zbatimin e vendimeve të GJK. Futeni çështjen në rend dite dhe dorëzojani drejtësisë Olta Xhaçkën,” përfundoi ai.
Nga ana tjetër, Niko Peleshi mbrojti mazhorancën, duke theksuar se kërkesa drejtuar Komisionit të Venecias nuk kishte lidhje me një deputet të caktuar, por me Kuvendin si institucion.
“Kërkesa jonë ndaj Komisionit të Venecias nuk kishte lidhje me një individ apo grup parlamentar të caktuar, por me Kuvendin dhe procedurat e tij. Falënderoj kryetaren e Kuvendit që respektoi procedurat dhe dërgoi pyetjet pasi u mbyll procesi për mandatin e zonjës Xhaçka. Opinioni i Venecias është pozitiv për të gjithë, madje më tepër për minorancën, sepse do të ndihmojë Kuvendin dhe institucionet e tjera në të ardhmen,” tha Peleshi.
