Festivali Ndërkombëtar i Arkitekturës “Bread & Heart Festival” do të zhvillohet në Tiranë nga datat 5 deri më 8 qershor. Më 6 qershor, nga ora 08:00 deri në orën 23:55, do të jetë dita e hapur e festivalit.
Edicioni i parë i këtij festivali, nën moton “Bukë dhe zemër / Sillni pak kripë, ju lutem”, ndërthur mikpritjen shqiptare me një ftesë për dialog të hapur dhe krijon një hapësirë lidhjeje mes arkitektëve ndërkombëtarë dhe atyre shqiptarë.
Një festival i mikpritjes, i arkitekturës dhe i dialogut mbi të ardhmen, ku vizionarët globalë dhe perspektivat lokale takohen, shkëmbejnë ide dhe frymëzojnë njëri-tjetrin, me pjesëmarrjen e disa prej studiove më prestigjioze të arkitekturës dhe arkitektëve më të njohur nga e gjithë bota.
Eventi do të mbahet në “Book Building”, në qendër të Tiranës, në sheshin “Skënderbej”.
Dita e hapur e festivalit do të ndahet në katër sesione, ku do të hapen ekspozita, do të zhvillohen konferenca dhe do të ketë edhe performanca artistike.
Më shumë se 150 grupe arkitektësh do të marrin pjesë në këtë ngjarje historike në fushën e arkitekturës, të ardhur nga vende të ndryshme të botës. Shumë prej këtyre grupeve janë tashmë të angazhuara në projekte zhvillimi në mbarë Shqipërinë.
Organizatorët e festivalit ftojnë arkitektët ndërkombëtarë që marrin pjesë të sjellin me vete edhe një mik të ri në këtë event — ose, siç thotë shprehja shqiptare, “sillni pak kripë” për “Bukë e zemër”.
