Të enjten, më datë 5 qershor, pritet të mbahen votimet për zgjedhjen e Presidentit të ri të Urdhrit të Psikologut të Shqipërisë, që do të drejtojë institucionin për katër vitet e ardhshme. Pas përfundimit të dy mandateve të Presidentes aktuale, Valbona Treska, gara për këtë post zhvillohet mes dy kandidateve: Elona Mustafaraj dhe Brunilda Laboviti.
Dy kandidate për drejtimin e institucionit
Elona Mustafaraj, aktualisht Sekretare e Përgjithshme në detyrë e Urdhrit të Psikologut, ka qenë për vite me radhë pjesë e strukturave drejtuese pranë këtij institucioni dhe ka punuar ngushtë me presidenten në largim, Valbona Treska. Mustafaraj shihet si një emër që garanton vazhdimësinë e linjës aktuale drejtuese.
Ndërkohë, kandidatja tjetër, Brunilda Laboviti, një psikologe me eksperiencë dhe figurë e njohur në fushën e shëndetit mendor, ka shpallur publikisht platformën e saj dhe është angazhuar në komunikim të drejtpërdrejtë me komunitetin profesionist. Në një mesazh në rrjetet sociale, Laboviti deklaroi:
“Kandidimi im për Presidente e Urdhrit të Psikologut është një dëshirë e mirë për t’ju përfaqësuar dhe për të qenë të gjithë bashkë në këtë rrugëtim! Do vlerësoja mbështetjen e çdo anëtari që me votë mund të përfaqësojë edhe veten e tij. Le të tregojmë se ne bëhemi dhe vendosim!”
Akuza për parregullsi dhe përjashtim të një kandidati
Procesi zgjedhor nuk ka kaluar pa debate. Gazetarja e kronikës së zezë, Klodiana Lala, ka ngritur akuza të forta mbi mënyrën se si po zhvillohet gara, duke vënë në pikëpyetje transparencën dhe ligjshmërinë e saj. Përmes një postimi në rrjetet sociale, Lala pretendon se Presidentja aktuale, Valbona Treska, po tenton të ndikojë zgjedhjet duke mbështetur një kandidate të besuar të saj – një referencë e qartë për Elona Mustafarajn.
Sipas Lalës, kandidati Altin Nika është përjashtuar padrejtësisht nga gara përmes një mase disiplinore të dyshimtë, ndonëse ai ka fituar të drejtën për të kandiduar përmes një vendimi gjyqësor.
“Altin Nika po pengohet të kandidojë, përmes një makinacioni sa të turpshëm aq edhe kriminal. Ai e goditi në gjykatë dhe fitoi të drejtën për të kandiduar. Por edhe vendimi i gjykatës për klanin Treska nuk pi ujë,” shkruan Lala, duke akuzuar edhe organet shtetërore për mosveprim.
“Prokuroria e Tiranës rri e bën sehir! Të gjithë ata që heshtin përballë këtij skandali, janë bashkëfajtorë!” – përfundon ajo mesazhin e saj.
Lista e plotë e kandidatëve për organet drejtuese të Urdhrit të Psikologut
Zgjedhjet e 5 qershorit do të përfshijnë edhe përfaqësues për kategori të tjera të strukturës së Urdhrit të Psikologut. Më poshtë, lista e plotë e kandidatëve:
Kategoria: President
- Brunilda Laboviti
- Elona Mustafaraj
Kategoria: Pedagog
- Dr. Lediana Xhakollari
- Dr. Jorida Rustemi
- Dr. Jonida Haxhiu
Kategoria: Shërbime
- Alfred Nela
- Andi Petro
- Anxhela Peza
- Arjola Panteqi
- Arjola Manreka
- Blerina Toma
- Elidon Shehu
- Eriselda Dervishi
- Erudita Fshazi
- Joana Brami
- Jona Begeja
- Migena Bakiaj
- Kristiana Jorgji
- Lorena Gjindoda
- Olta Jaçellari
- Osvaldo Turmalaj
- Suela Kalaja
- Sonila Jaupbashi
- Valentina Telhaj
Kategoria: Shoqata
- Jonida Guri
- Xhensila Lato
Zgjedhjet për organet drejtuese të Urdhrit të Psikologut vijnë në një moment kritik për integritetin institucional dhe besueshmërinë profesionale të këtij institucioni. Votimi i 5 qershorit do të tregojë nëse komuniteti i psikologëve do të zgjedhë vazhdimësinë apo ndryshimin
