Jessie J, këngëtarja e njohur britanike 37-vjeçare, ka bërë të ditur se është diagnostikuar me kancer të hershëm të gjirit. Lajmin e ndau përmes një videoje në Instagram, duke theksuar rëndësinë e zbulimit të hershëm dhe duke shprehur vendosmërinë për ta përballuar me forcë këtë sfidë.
Ajo njoftoi se pas performancës në “Summertime Ball” më 15 qershor, do t’i nënshtrohet një ndërhyrjeje kirurgjikale dhe do të marrë pak kohë për t’u rikuperuar. Jessie pranoi se kishte hezituar ta ndante këtë lajm, por vendosi të jetë e hapur për të ndihmuar edhe të tjerët që po kalojnë situata të ngjashme.
Në postimin e saj, ajo falënderoi fansat për mbështetjen dhe tha se diagnoza i ka dhënë një perspektivë të re për jetën, duke pranuar gjithashtu se ka nevojë për përkrahje emocionale.
Sipas OBSH-së, në vitin 2022 rreth 2.3 milionë gra në mbarë botën u diagnostikuan me kancer gjiri, ndërsa 670,000 humbën jetën si pasojë e kësaj sëmundjeje.
Jessie J ka qenë më parë e hapur për sfidat personale, përfshirë humbjen e një shtatzënie në vitin 2021. Aktualisht, ajo është nënë e një djali 2-vjeçar me basketbollistin Chanan Colman.
