Agjencia e Ushqimit dhe Veterinarisë e Kosovës ka vendosur të ndalojë përkohësisht importin e deleve dhe dhive nga qarqet e Shkodrës dhe Kukësit në Shqipëri, si masë parandaluese pas shpërthimit të konfirmuar të sëmundjes PPR (Peste des Petits Ruminants), e njohur ndryshe si murtaja e bagëtive të imta.
Sipas njoftimit zyrtar, vendimi vjen pas raportimeve për raste të sëmundjes tek dhitë në qarkun e Shkodrës. Për të shmangur përhapjen e kësaj sëmundjeje ngjitëse dhe shumë të rrezikshme për bagëtitë, autoritetet kosovare kanë urdhëruar ndalimin e menjëhershëm të importit të ruminantëve të vegjël nga këto rajone shqiptare.
“Agjencia e Ushqimit dhe Veterinarisë vendosë masë ndalese të përkohshme për importin e deleve dhe dhive nga regjioni i Shkodrës dhe Kukësit në Shqipëri, pas konfirmimit të shpërthimit të sëmundjes PPR tek dhitë në qarkun e Shkodrës”, thuhet në komunikatë.
Gjithashtu, janë paralajmëruar kontrolle të shtuara në të gjitha pikat kufitare me Shqipërinë, për të garantuar mbrojtjen e territorit të Republikës së Kosovës nga përhapja e kësaj sëmundjeje.
