Në një fermë të mbarështimit të dhive në fshatin Postribë, në Shkodër është konfirmuar rasti i parë i murtajës së bagëtive të imta. Autoriteti Kombëtar i Veterinarisë dhe Mbrojtjes së Bimëve deklaron se mostrat janë marra nga Shërbimi Veterinar dhe janë analizuar nga Instituti i Sigurisë Ushqimore dhe Veterinarisë, i cili ka konfirmuar praninë e virusit, teksa ferma është karantinuar për të eleminuar bagëtinë. “Pas konfirmimit të rastit, janë ndërmarrë menjëherë të gjitha masat e parashikuara në legjislacionin përkatës dhe në Planin Kombëtar të Kontigjencës me qëllim kontrollin, izolimin dhe menaxhimin efektiv të situatës në terren”-thuhet në deklaratë. Drejtori i Përgjithshëm i Sherbimit Veterinar në Shkodër, Sulejman Kullolli është shprehur se ferma është karantinuar ndërsa ka theksuar se mishi i kafshëve të sëmura nuk lejohet për tregtim. “Siç jeni në dijeni, për herë të parë në Shqipëri u shfaq murtaja në një fshat në Postribë. Kjo sëmundje u njoftua nga fermeri më datën 3 qershor. Ferma është vënë në karantinë. Janë marrë mostra. Sot bëhet eliminimi i krerëve dhe do izolohet zona në 3 dhe 10 km. Ka dalë edhe urdhëri i Ministrit ku ndalohet lëvizja e kafshëve brenda territorit pra në Shkodër dhe Malësi e Madhe nuk lejohet lëvizja e kafshëve kjo për të parandaluar vazhdimin. Kjo sëmundje infektive prek të imtat, por nuk kërcënon shëndetin e njerëzve. Nga monitorimi kishim një indicie dje në një tjetër zonë. Ne u paraqitem në fermë, por nuk u konstatuan shenja të kësaj sëmundje. Me masat kufizuese, kanë dalë masat përkatëse dhe me institucione dhe po ndalojmë lëvizjen e kafshëve”, tha Kullolli. Por përkundrejt këtyre deklaratave të institucioneve në Shqipëri, Agjencia e Ushqimit dhe Veterinarisë në Kosovë vendosë masë ndalese të pakohshme, për import të ruminantëve të vegjël Dele dhe Dhi nga regjioni i Shkodrës dhe Kukësit në Shqipëri. Pas lajmërimit për konfirmim të shpërthimit të sëmundjes PPR (Peste des Petits Ruminants) tek kafshët e llojit të dhisë në Qarkun e Shkodrës në Republikën e Shqipërisë. Autoritetet kufitare do të shtojnë masat e kontrollit në të gjitha pikat kufitare me Shqipërinë, me qëllim parandalimin e futjes së kësaj sëmundjeje në territorin e Republikës së Kosovës.
