Republikanët në Senatin amerikan kanë sinjalizuar mbështetjen e tyre për retorikën e ashpër të presidentit Donald Trump ndaj Iranit, vetëm disa orë përpara afatit që ai ka vendosur për hapjen e Ngushticës së Hormuzit.
Në një postim në rrjetet sociale, një llogari zyrtare e republikanëve në Senat deklaroi: “Irani do të ishte i mençur ta marrë fjalën e presidentit Trump seriozisht. Ata mund të zgjedhin rrugën e lehtë ose rrugën e vështirë.”
Më herët gjatë ditës, Trump kishte kërcënuar në rrjetet sociale se do të shkatërronte “të gjithë qytetërimin” e Iranit me bombardime nëse udhëheqësit iranianë nuk do të lejonin kalimin e anijeve përmes Ngushticës së Hormuzit.
Ndërkohë, një numër gjithnjë në rritje demokratësh kanë kërkuar largimin e Trump nga detyra për shkak të këtyre kërcënimeve. Disa prej tyre kanë bërë thirrje për nisjen e procedurave të impeachment, ndërsa të tjerë kanë përmendur Amendamentin e 25-të të Kushtetutës amerikane, i cili parashikon heqjen e kompetencave të presidentit nëse ai konsiderohet i paaftë për të ushtruar detyrën.
Thirrjeve për largimin e Trump iu bashkua edhe Marjorie Taylor Greene, ish-përfaqësuese republikane që më parë ishte një nga aleatet më të forta të tij, por që së fundmi është shndërruar në një nga kritiket më të zëshme.
Demokratët kishin shmangur kërkesa të tilla në fillim të mandatit të dytë të Trump, por shumë ligjvënës duket se e shohin luftën në vazhdim si një pikë kthese në qëndrimin e tyre.
