Zëvendëspresidenti amerikan JD Vance ka akuzuar zyrtarët e Bashkimit Europian në Bruksel për ndërhyrje në zgjedhjet në Hungari, duke e quajtur atë “një nga shembujt më të këqij të ndërhyrjes së huaj elektorale” që ka parë ndonjëherë.
Gjatë një deklarate publike, Vance kritikoi ashpër atë që e quajti “burokracia në Bruksel”, duke thënë se ajo është përpjekur të dëmtojë ekonominë e Hungarisë.
“Ata e kanë bërë këtë sepse e urrejnë këtë njeri”, tha Vance, duke iu referuar kryeministrit hungarez Viktor Orbán, ndërsa e cilësoi ndërhyrjen si “të turpshme”.
Ai u bëri thirrje votuesve hungarezë të mos e shohin debatin nëse dikush është pro apo kundër Europës apo SHBA-së, por të vlerësojnë se kush është “pro njerëzve të Hungarisë”.
“Unë kam parë një njeri që ka mbrojtur me forcë interesat e Hungarisë”, tha Vance për Orbán.
Në fund të deklaratës së tij, Vance tha se një nga arsyet pse ai ndodhej në Hungari ishte pikërisht ajo që e quajti ndërhyrje e tepruar e burokracisë së Brukselit, duke shtuar se nuk do t’u tregojë hungarezëve si të votojnë, por u bëri thirrje zyrtarëve europianë të bëjnë të njëjtën gjë.
