Një ngjarje e rëndë është regjistruar në zonën e Lungomares në Vlorë, ku një qen i racës pitbull ka sulmuar dhe kafshuar një vajzë 4-vjeçare.
Sipas informacioneve paraprake, qeni dyshohet të ketë qenë pa pronar. Në momentin e sulmit, e mitura ndodhej në zonë së bashku me gjyshen e saj, ndërsa ka pësuar dëmtime në pjesën e kokës.
Pas incidentit, vajza është transportuar me urgjencë drejt Spitalit Rajonal të Vlorës për të marrë ndihmën mjekësore të nevojshme.
Familjarët e saj shprehen të tronditur nga ajo që ndodhi. Në një prononcim për mediat, nëna e vajzës tha se familja po përjeton një gjendje të fortë ankthi dhe tensioni pas sulmit.
Ndërkohë, qeni është neutralizuar dhe mbajtur i lidhur, ndërsa pritet të merret në administrim nga autoritetet përkatëse për t’u dërguar në një qendër të specializuar për trajtimin dhe mbrojtjen e kafshëve.
