Presidenti i SHBA-së, Donald Trump, kërcënoi me burgim një gazetar që publikoi informacion për një pilot amerikan të zhdukur në Iran pas rrëzimit të një avioni luftarak F-15, duke thënë se media duhet të zbulojë burimin e saj për arsye të sigurisë kombëtare.
Gjatë një konference për shtyp në Shtëpinë e Bardhë, Trump tha se administrata e tij po kërkon të identifikojë personin që ka nxjerrë informacionin sekret dhe paralajmëroi se kompania mediatike që publikoi lajmin mund të detyrohet të zbulojë burimin ose të përballet me pasoja ligjore. 
“Do të shkojmë te kompania e medias dhe do t’i themi: për arsye të sigurisë kombëtare, dorëzojeni burimin ose shkoni në burg”, deklaroi Trump, duke argumentuar se rrjedhja e informacionit mund të ketë rrezikuar operacionin për shpëtimin e pilotit. 
Sipas raportimeve të mediave ndërkombëtare, informacioni i publikuar kishte të bënte me një pjesëtar të forcave ajrore amerikane që mbeti i zhdukur për një periudhë pasi avioni i tij u rrëzua në Iran, ndërsa më pas u shpëtua gjatë një operacioni të rrezikshëm kërkim-shpëtimi. 
Deklaratat e Trump kanë ngjallur reagime të menjëhershme nga organizatat për lirinë e shtypit dhe ekspertët ligjorë, të cilët paralajmërojnë se kërcënimet për burgim të gazetarëve për të zbuluar burimet e tyre bien ndesh me mbrojtjen tradicionale që gëzon shtypi në SHBA. 
