Kryeministri Edi Rama deklaroi se të thuash që Shqipëria sot ka më shumë korrupsion është “të flasësh përçart”. Por kjo deklaratë vjen nga drejtuesi i një qeverie ku më shumë se gjysma e kabinetit është përfshirë në hetime për korrupsion nga SPAK, me ministra që kanë përfunduar në burg ose nën akuzë.
Gjatë një aktiviteti për prezantimin e vendeve të lira të punës në sektorin publik, Rama u ndal edhe tek procesi i integrimit europian, duke mohuar që negociatat me Bashkimin Europian të jenë bllokuar.
“Flitet e përflitet lartë e poshtë për arsye të mosarsyes se negociatat janë bllokuar, janë ndaluar, janë penguar… Kjo është totalisht e pavërtetë. Kush i thotë këto, nuk e ka fare idenë se për çfarë flet. Negociatat nuk janë një shëtitje në lendinë, por janë një proces testimi i vazhdueshëm dhe provimesh të vazhdueshme”, u shpreh Rama.
Sipas tij, procesi po vijon sipas agjendës së parashikuar dhe prilli do të jetë një muaj me diskutime intensive me vendet anëtare të BE-së.
