Presidenti i Shteteve të Bashkuara, Donald Trump, ka lëshuar një tjetër kërcënim të fortë ndaj Iranit, ndërsa afati që ai ka vendosur për hapjen e Ngushticës së Hormuzit po afrohet.
Në një postim në platformën e tij Truth Social, Trump paralajmëroi për pasoja të rënda, duke përdorur një gjuhë dramatike.
“Një civilizim i tërë do të vdesë sonte, për të mos u rikthyer më kurrë,” shkroi ai në fillim të mesazhit.
Megjithatë, presidenti amerikan shtoi se nuk dëshiron që një skenar i tillë të ndodhë, edhe pse sipas tij kjo mundësi mbetet reale.
“Unë nuk dua që kjo të ndodhë, por ndoshta do të ndodhë. Megjithatë, tani që kemi një ndryshim të plotë dhe total të regjimit, ku mendje të ndryshme, më të zgjuara dhe më pak të radikalizuara do të mbizotërojnë, ndoshta mund të ndodhë diçka revolucionarisht e mrekullueshme,” shkroi Trump.
Ai e mbylli mesazhin duke theksuar se zhvillimet e orëve të ardhshme mund të jenë historike.
“Kush e di? Do ta zbulojmë sonte. Ky është një nga momentet më të rëndësishme në historinë e gjatë dhe komplekse të botës. 47 vjet zhvatje, korrupsion dhe vdekje më në fund do të marrin fund. Zoti i bekoftë njerëzit e mëdhenj të Iranit,” përfundoi Trump.
