Nga Vau i Dejës ku po mban një takim, kreu i Partisë Demokratike, Sali Berisha paralajmëroi ndryshime ligjore në Kodin Civil, duke sanksionuar me ligj shenjtërinë e familjes.
Një deklaratë e tillë Berisha lë të nënkuptojë që shteti nuk do pranojë modele të tjera të familjes (si bashkëjetesat jashtëmartesore, çiftet e të njëjtit seks etj.), dhe madje mund të synojë t’i përjashtojë ose t’i penalizojë ato nëpërmjet ligjit.
Si parti e djathtë dhe konservatore, Berisha po kërkon të mobilizojë elektoratin me kartën e shenjtërisë dhe moralit, si pjesë e një axhende më të gjërë.
Gjatë fjalës së tij, Berisha sulmoi ashpër Ramën se nuk kujdeset për shqiptarët, as sa gjermanët për kafshët shtëpiake. Si shembull solli propozimin e PD për minimumin jetik, refuzuar nga Rama, teksa gjermanet aq lek ua japin familjeve për të mbajtur qen e mace.
"8 miliardë euro – kjo është shuma që Edi Rama vuri përpara buxhetit, duke refuzuar kategorikisht ligjin që ne çuam në Parlament për minimumin jetik. Ne kërkuam t’i garantojmë çdo shqiptari një standard minimal jetese, që askush të mos jetojë në varfëri ekstreme. Por ai e hodhi poshtë këtë nismë, duke thënë se “kjo krijon një humnerë”.
Ndërkohë, për 700 mijë pensionistë, la vetëm 16 milionë euro – shumë më pak se ajo që Gjermania shpenzon për 720 mijë qen shtëpiakë, të cilëve u jep çdo muaj 130 euro, dhe 110 euro për macet. Kjo është e vërteta!"- tha Berisha.
Për kreun e selisë blu PD, duhet të ulet me çdo qytetar sepse është koha të flitet për dinjitetin, jo për mbijetesë.
